Fanfare Izeg 2015

Wëllkomm

Merci dass der bei ons era luusst.

Logo Fanfare

D'Izeger Musek gouf 1920 gegrënnt a gehéiert zanterhier zum Duerfliewen.

Haut besteet de Veräin aus enger jonker, dynamescher Equipe vu 44 Musikanten, déi bei all Manifestatioun am Duerf fir déi adequat Stëmmung suergt. Doriwwer eraus vertrëtt d'Izeger Musek Izeg iwwer d'Grenze vun der Hesper Gemeng eraus, sief et duerch sëlleche Concerten oder duerch Optrëtt vun der Strëpp, den Heebléiser, déi traditionell Lidder op alle Manifestatiounen am Land spillen.

All Saison studéiert a presentéiert d'Izeger Musek dräi Programmer, e Chrëschtconcert, e Galaconcert am Fréijoer an e lëftege Summerprogramm. De Repertoire ass enorm a geet duerch all Beräicher vun der Blosmusek.

D'Stëmmung an der Musek ass richteg gutt an den Asaatz vun de Musikanten an alle Leit ronderëm ass enorm. Am Schnëtt huet d'Fanfare am Joer ca. 30 Manifestatiounen déi an enger flotter Ambiance iwwer d'Bühn ginn.

Dir wëllt ons engagéieren? Dir sidd Musikant an hutt Loscht fir bei ons mat ze maachen? Da kontaktéiert onse Sekretär. Mat him kënnt dir d' Detailer bespriechen.

Dirigentewiessel 2015

No 21 Joer erfollegräicher Aarbecht um Dirigentepult, huet de Luc Rollinger decidéiert, méi lues ze trëppelen. Am Oktober huet hien dem Steve Schleich d'Direktioun vun der Musek iwwerlooss, bleift awer weiderhin der Musek als Musikant erhalen. D'Fanfare Izeg seet dem Luc och op dëser Plaz nach emol Merci fir all déi aussergewéinlech Aarbecht, déi hie geleescht huet. Mir freeën ons, dass hien och an Zukunft dem Veräin zur Verfügung steet.

Dem Steve wënsche mir vill Erfolleg a mir freeën ons op eng gutt a flott Zesummenaarbecht.

Conseil d'administration

D'Fanfare Izeg a.s.b.l. gëtt vun engem Conseil d'administration vun 9 Leit geleet. Deen ass ëmmer gutt beschäftegt fir déi sëlleche Manifestatioune vun der Musek ze organiséieren an ze finanzéieren.
Weider Detailer...

Museksall

De Sëtz vun der Musek ass am Gebai vun der Aler Schoul zu Izeg No. 3, op der Hesperstrooss. Hei profitéiere mir vun engem schéine Sall, deen d'Gemeng renovéiert huet an dee mir de 19. September 2003 aweie konnten. Mir prouwe regelméisseg freides um 19H30 zesumme mat de jonke Musikante bis 20H30. Duerno, déi net méi sou jonk bis 21H30.

Heebléiser

Logo Heebléiser

D'Strëpp vun der Izeger Musek ass oft dobäi wann eng Kaz geschleeft gëtt a spillt ëmmer déi passend Stëmmungsmusek. Am Repertoire si klasseg lëtzebuerger Lidder fir matzesangen, mee och bayresch Schunkellidder oder franséisch Chansonen.

Frënn vun der Izeger Musek

Logo Frënn vun der Musek

Zanter 2003 huet d'Izeger Musek duerch d'Grënnung vun de Frënn vun der Izeger Musek eng staark Ënnerstëtzung krut. Si hëllefen der Musek wou se kënnen. Fir hier Aarbecht si mir dankbar. Mir wënschen hinne weiderhi vill Succès an ons zesumme vill flott Stonnen.

Merci un all eis Nolauschterer a Supporteren

Alles wier net esou cool ouni ons trei Supporteren. Hinne gehéiert onse Merci a mir freeën ons, wann esou vill Leit wéi méiglech ons lauschteren a sech mat ons zesummen ameséieren.